Kooti y’amagye etuula e Makindye esalidde abaali abayeekera ba Allied Democratic Forces   2 ekibonereso kyakuttibwa, oluvannyuma lw’okusingibwa omusango gw’okutega bbomu ezaaviirako abakyala 2 okufa mu mwaka 2025.

 

Abasaliddwa ogw’okuttibwa ye Hamza Byavaala ne Hadil Walusansa olw’okuluka olukwe olw’okutega bbomu ezaabwatuukira okuliraana eklezia y’abajulizi e Munyonyo n’endala nebwatuukira okumpi n’akatale ke Kalerwe, nga zaafiiramu abakazi babiri Sumayiya Byaruhanga ne Sawiya Azatu.

Sumayiya Byaruhanga yafa ku lunaku lw’abajulizi nga 03 June,2025 okumpi ne Munyonyo Martyrs Shrine, bbomu gyeyali yetisse bweyabwatuka nemubetenta, ate ye Sawiya Azatu yakubwa byasi abasirikale abalwanyisa obutujju aba Joint Anti-Terrorism Taskforce abaali bamulinnya akagere, nga yali naye alina bbomu gyeyali agenda okutulisiza ku katale e Kalerwe nga 21 June,2025.

 Kooti egamba nti obujulizi bwerina bulaga nti abasajja abo ababiri abasingisiddwa omusango baaseendaseenda abakazi abo okuva mu Busoga nga babasuubizza ddiiru eyali egenda okukyusa obulamu bwabwe.

Obujulizi obuli mu kooti bulaze nti baapangiriza abakazi abo ennyumba mu Kampala, era eyo gyebaasinziira nebabatikka bbomu emu nebwatuukira e Munyonyo nendala abakugu gyebaalabuukirira nga bukyali, omukazi gwebaali bajitisse nebamukuba ebyasi nga tenatulika kutta bantu.

 Abavunanibwa omusango baaggukkiriza era nebalumiriza nti waliwo omujaasi eyaluka olukwe olwo nga ye Ephraim Byaruhanga, nti nga yali agenderera kuwaliriza government okwongera sente mu bikwekweto by’okulwanyisa obutujju mu ggwanga

Omulamuzi wa kooti y’amagye Brigadier Richard Tukacungura ababiri abasalidde gwakuttibwa, agambye nti ebikolwa byabwe byaviirako obulamu bw’abantu okutokomoka, saako okuteeka eggwanga ku bunkenke, nebaleetera bannansi okutya n’okweraliikirira.

Basabye omulamuzi abawe ekibonerezo ekisaamusaamu, wabula omulamuzi abigaanye era naabasalira gwakuttibwa, wabula nabawa amagezi nti basobola okujulira ekibonerezo ekibasaliddwa.

Bisakiddwa: Betty Zziwa