Ekitongole ekirungamya ebisomesebwa mu matendekero agaawaggulu, ekya National Council of Higher Education, (NCHE), kiwagidde aba Mbarara University of Science and Technology, (MUST), okugenda mu maaso nga basomesa amasomo agakwata kukutabula eddagala  (Pharmacy) ku mutendera ogwa degree, wadde aba Pharmaceutical society of Uganda, kino baakiwakanyizza.


Ekibiina ekitaba abatunda eddagala ekya Pharmaceutical society of Uganda, baafulumizza ekiwandiiko nga kigamba nti abayizi bonna abasomye degree mubya Pharmacy, ku  Mbarara University, nti  tebafuna bukugu bumala.


Bagamba nti naabakulira ebbanguliro ly'abasoma Pharmacy, obukugu bwebalina buli mu byabujjanjabi obwa Nursing, nga noolwekyo kiba kikyamu ate okuba nga bebakulira Pharmacy, nti babeera tebasobola kuwa bukugu obuyambako abayizi okusoma essomo lino ku mutendera gwa degree.

B


Baategezezza nti mu lutuula lwabwe olwomulundi ogwe 127 olwatuula ku Friday nga 4 September 2026, baakizuula nti Mbarara talina lukusa kusomesa bayizi ku mutendera gwa Degree mu bya Pharmacy.


Wano  Pharmacuatical Society of Uganda weyasinziira neewandiikira  Mbarara University obutaddamu kusomesa n'okuwandiisa abayizi abasoma essomo lya Pharmacy ku mutendera gwa degree.


Dr. Lutoti Stephen, akulira aba Pharmaceutical society of Uganda, ategeezezza nti government erina okuyingira mu nsonga eno amangu ddala era nebawa Mbarara University ennaku 30 okuyimiriza ebyokusomesa abayizi.


Wabula  Prof. Mary Okwakol, ssenkulu wa National Council for Higher Education, mukwogerako ne bannamawulire agambye nti abayizi baakusigala nga basomesebwa era naalabula aba Pharmaceutical society of Uganda, okwewala okugenda mu byetalinaako buyinza, era nti siyeerina obuyiinza okuyimiriza University okusomesa amasomo agamu, awatali kusooka kwebuuza ku National council for Higher Education.


Prof. Mary Okwakol, mungeri yeemu agambye nti tewali muyizi agenda ku kosebwa mu mbeera eno, era agumizza abayizi naabazadde ababadde basasula ebisale okusoma essomo lino okugenda mu maaso nokuba abavumu ku nteekateeka eno.


Amyuuka sipiika wa parliament ya Uganda Thomas Tayebwa era naye agambye nti abayizi ababadde basoma essomo lino ku ssetendekero wa Mbarara baamukubidde nga beemulugunya, kwekuyita abakulu mu ministry y’ebyenjigiriza, okugenda mu parliament balungamye ku nsonga eno.#


Bisakiddwa: Ddungu Davis