Omubiri gw'Omukama Oyo Nyimba Kabamba Iguru Rukidi IV gusuubirwa okutuusibwa mu Uganda ku Thursday nga 03 September,2026.

 Minister w'ensonga z'obwapresident Milly Babalanda nga ye ssentebe w'olukiiko lwa government olukola ku nteekateeka z'okuziika, agambye nti omubiri gw'Omukama gusuubirwa okutuusibwa ku butaka ku kisaawe Entebbe ku ssaawa Nnya ez'okumakya era president Yoweri Kaguta Museveni agenda kubeerawo ng'omukungubazi omukulu.

 

Mu lukiiko lwaba minister olutudde mu Maka g'obwapresident Entebbe  nga lukubiriziddwa omukulembeze w'eggwanga Yoweri Kaguta Museveni Tibuhaburwa , ba minister bakubagizza Obukama bwa Tooro ne president Yoweri Kaguta Museveni yennyini ng'omu ku bakuza b'Omukama Oyo Kabamba Nyimba Iguru Rukidi IV.

 

Government yeyamye okukola ku nteekateeka zonna ez'okukomyawo omubiri gw'Omukama okuva mu  America gyeyafiiridde nga 27 August,2026,okuziika n'enteekeeka endala.

 

 

Minister Babalanda agambye nti ku kisaawe Entebbe ,basuubira omukulembeze w'eggwanga okubeeraawo ng'omukungubazi omukulu ,olwo bwegunagyibwa ku kisaawe, gwakuteekebwa ku nnyonyi endala gutwalibwe e Kyegeegwa, oluvanyuma gujjakuteekebwa ku kigaali guvugibwe okutwalibwa e Fort Portal mu lubiri lwe Kaluziika.

 

 

Milly Balanda agambye nti gavument egenda kukola ku nteekateeka zonna, okuli okokomyawo kuno omubiri gw'Omukama, okuliisa abakungubazi, n'emisoso emirala gyonna egyetaagisa okuwerekera Omukama mu kitiibwa ekimujaamu.

 

 

President Museveni yalangirira nti eggwanga lyakukungubaga okumala ennaku 3 okuli olunaku oluddirira okuziika , Olunaku olw'okuziika saako olunaku ng'okuziika kuwedde, nga bendera 'zeggwanga zigenda kuba zeewuubira mu makati g'emirongooti munda mu ggwanga ne ku bitebe bya Uganda mu mawanga amalala.

 

Government era yalangirira nti Omukama Oyo Nyimba Kabamba Iguru agenda kuziikibwa mu bitiibwa by'eggwanga  ng'omukulembeze ow'ennono ow'Obukama bwa Tooro. 

 

Mu mbeera Eno, gavument okuyita mu kakiiko kaayo akakola ku kuteekateeka emikolo akamanyiddwanga The National Organising Committee akakulemberwa minister w'ensonga zobwa president Milly Babalanda kaatandiikirawo okukola ku nteekateeka zonna nga kakolera wamu n'obukulembeze bwobukama bwa Tooro.#