Abantu okuva mu kampuni n'ebitongole eby'enjawulo, saako abazze kinnoomu betabye mu kyeggulo Kaliisoliiso 2026, ekigendereddwamu okusonda ensimbi ez'okuzimba ekifo awajjanjabirwa abagudde ku bubenje mu ddwaliro ly'e Nkozi.

Bannaddiini n'ababaka ba parliament nabo betabye ku kyeggulo kya Kaliisoliiso ekinyumidde ku Hotel Africana mu Kampala.

Katikkiro Charles Peter Mayiga yaabadde omugenyi omukulu.

Afrigo band, omuyimbi Sheebah Kalungi, Jose Chameleon, Weasle, bannabitone Madrat ne  Chico saako Salvador the man from Gondokolo bebasanyusizza abantu abazze mu bungi ku Kaliisoliiso dinner 2026.


Ekyeggulo kino kitegekebwa Obwakabaka bwa Buganda okuyita mu CBS radio.


Kisimbulizibwa okuva mu ppulogulaamu ya Kaliisoliiso eweerezebwa ku mpewo za CBS 88.8 okuva monday okutuuka Friday, ku ssaawa emu n'ekitundu okutuuka bbiri.

Pulogulaamu eweerezebwa Hajji Abby Mukiibi,Hajji Abbu Kawenja, Peace Diane ne Rajab Kanaakulya.

Katikkiro Charles Peter Mayiga yebazizza CBS olw'okubeera abayiiya nga baleeta emiramwa egigasa abawuliriza baayo, okuzimba Obwakabaka n'eggwanga okutwaliza awamu.

Yebazizza ne ba nnamikago okuli MTN Uganda,Centenary ne Rotary,  abafaayo okukwatirako CBS okulaba ng'omulimu gw'okuzimba Accident Trauma Centre ku Nkozi hospital nga gumalirizibwa ate ku mutindo ogwetaagisa.

Alabudde abantu okwewala okwenyigira mu bintu ebivaako obubenje ku makubo, omuli okunywa ennyo omwenge,okukozesa ebiragalalagala,obutawummula, okwogerera ku ssimu ng'ovuga, abalera abaana ng'eno bwebavuga emmotoka n'ebirala.

Omuteesiteesi omukulu mu ministry y'ebyobulamu Diana Atwine awadde ebibalo ebikwata ku bubenje, ng'omwaka 2025 gwokka obubenje 15,649 bwebwagwawo

Abantu omutwalo 10,956 bebaafiira mu bubenje obwo.

Ssenkulu wa CBS Michael Kawooya Mwebe akunze bannauganda okwegatta ku CBS mu kiseera kino ng'ejaguza emyaka 30 bukya etandikibwawo, okuwagira omulamwa ng'okusomesa bannauganda ku bubenje ogwatuumwa "Labuka Tofiira ku kkubo".#