Enduulu eyoluleekeleeke esaanikidde essomero lya Mt. St. Henry’s High School Mukono, olw'engeri abayizi b’amasomero abakungaanidde ku ssomero eryo gyebabadde baddamu ebibuuzo ebibabuuziddwa mu program entanda ya Buganda eyindidde ku ssomero eryo.


Abayizi okubadde Zziwa Stephen ne Mutebi Willison aba Mt. St. Henry’s High School MuKono nebannaabwe okubadde Mukiibi Ethro ne Sserunkuuma Telly aba St. Cyprian High School Kyabakadde bazzeemu ebibuuzo mu ngeri eyewuunyisizza buli muntu.


Abategesi b'Entanda ya Buganda omwaka guno 2026 okuli CBS fm, MTN Uganda ne MTN MoMo baasalawo okutwala entanda ya Buganda mu masomero, ng’omu ku kaweefube owokutumbula Olulimi Oluganda mu bayizi n’okubawa omukisa okwolesa n’okuganyulwa mu kumanya kwabwe nga bawebwa ebirabo gaggadde.


Entanda ya Buganda egenze okufundikirwa ng'abayizi; Zziwa Stephen owa Mt. St. Henry’s High School Mukono yeetisse banne n’obugoba 27, addiriddwa Sserunkuuma owa St. Cyprian High School Kyabakadde n’obugoba 13 era nga bano beesozze olumeggana oluddako.


Mutebi Willison owa Mt. St. Henry’s High School Mukono akutte kyakusatu n’obugoba 8 Mukiibi Ethro owa St. Cyprian High School Kyabakadde afunye obugoba 7 era bano bombi bawanduse mu Ntanda ya Buganda.


Buli muyizi eyeetabye mu ntanda ya Buganda mu kiro ekikeesezza leero agyogeddeko bubwe.


Omusomesa w’Oluganda ku Mt. St. Henry’s High School Mukono Kabuye Faruk Wakasanke asabye amasomero okwongera amaanyi mu kubangula abayizi mu Lulimi Oluganda.


Omu ku balamuzi ba program Entanda ya Buganda Lubega Ssebende agambye nti omutindo abayizi gweboolesezza guwa essuubi eri Buganda eyomumaaso.


Entada ya Buganda evujjiriddwa Movit ne St. Peters Ss Bbombo Kalule.


Bisakiddwa: Ssekajjijjja Augustus