Abakozi 2 mu  ministry y'ebyentambula n'enguudo bakwatiddwa nebaggalibwa ku police ye Mpigi ku kiragiro kya Minister w'ebyentambula n'enguudo Fred Byamukama, ng'abalumiriza okubeera emabega wabantu abaazimba amayumba ag'ekimpatiira awagenda okuyita oluguudo lwa Kisubi-Nakawuka-Nateete-Kasanje-Mpigi,nekigendererwa ekyokubinika government obuwanana bw'ensimbi okubaliyirira.

Kigambibwa nti abakozi bano baatuuka n'okuzimba ebiggya ebitaliimu bafu beyorere ku ensimbi. 

‎

‎Abakwate ye Engineer Isaac Akampa omubaririzi w'ettaka n'ebyobugagga ebiri ku ttaka ewagenda okuyita oluguudo luno(valuer,) ne Elijah Sekitto omupunta (surveyor) nga bano bakolera mu department y'ebyettaka mu ministry y'ebyentambula. 

‎

‎Bino bibaddewo  ku kyalo Lufuka mu district ye mpigi, Minister Fred Byamukama bwabadde alambula oluguudo lwa Kisubi-Nakawuka-Nateete-Kasanje-Mpigi olukolebwa kampuni y'Abachina eya China Communications Construction Company (CCCC) oluweza kilo mita 72.5 okulaba welutuuse, oluvanyuma lwokufuna okwemulugunya okuva mu batuuze nti omulimu gutambula kasoobo.


‎Kigambibwa nti Abakulu bano okumanya tebawena, baasoose kubuzabuuza minister nebamutwala mu nsiko gyasoose okubulira nga tebagala kumutuusa mu kifo gyebaweera abafere ssente, kubiyumba ebyekimpatiira. 

‎

‎Minister akizudde nti waliwo Abatuuze abekobaana n'abakozi ba ministry bano nebabikka government akatambala ku maaso, bwebabatega ebizimbe byebifulukwa, entaana ezitaliimu bafu, tooyi ezitaliimu binnya, kalina ezebiti, n'ebirala.

Kigambibwa nti yiika y'ettaka emu ku kyalo ewaakolebwa obufere obwo,yagulibwa obuwumbi bwa shs bubiri.

‎

‎Waliwo omutuuze asibye omutima nabuulira minister byonna ebikwata ku mayumba gano n'alumiriza mutuuze munnabwe Kafeero Joseph nti akolagana n'abanene mu government nebazimba ebiyumba basobole okubba government.


‎Minsiter asazeewo agende yerabireko, era ekimuggye enviiri ku mutwe kwekusanga ttooyi zebaalaga ministry okubaliyirira nga temuli kinnya ssaako nebiggya ebyayoyoteddwa obulungi, kyokka Abatuuze nebakamutema nti temuli bafu , kyokka ngettaka lino omubaririzi yalibalirira ku buwumbi 2 buli yiika. 



‎Minister fred Byamukama agamba ekizingamizza oluguudo luno  bebalyake, nga n'ensimbi ezigenda ku luguudo zibadde zakuliyirira batuuze abali ku ttaka lino.

Okusinziira ku biwandiiko ebiRi mu minisTRY betaaga obuwumbi 430 Bn, ng'okulukola kyetaagisa obuwumbi 340 bwokka.


Kino kitanudde minister kwekulagira police ebakwate bunnambiro omubalirizi w'ettaka n'omupunta batwaribwe mu kooti kiwe abalala ekyokuyiga. #

‎