Omuzibizi wa ttiimu y’eggwanga ey’omupiira ogw’ebigere eya Uganda Cranes, Elio Capradossi, yegasse ku club empya eya AS Cittadella egucangira mu liigi y’ekibinja eky’okubiri (Serie B) mu Italy.
Elio Capradossi abadde talina club ekiseera ekiyise oluvanyuma lw’okwabulira club ya Lecco Calcio nayo ye Italy kunkomerero ya sizoni ewedde oluvanyuma lw’endagaano ye okugwako.
Elio Capradossi club gy’agenzemu eya AS Cittadella, agenda kugizannyira okutuuka kunkomerero ya sizoni eno 2024/2025.
Omuzannyi ono yatuuka n’okusuulibwa ku ttiimu ya Uganda Cranes ku mipiira egisembyeyo egya Africa Cup of Nations qualifiers olw’obutaba na club gy’azannyiramu.
Capradossi yatandika okuzannyira Uganda Cranes omwaka guno 2024 bwe baali battunka ne Botswana mu mpaka za World Cup Qualifiers, era yakazannyira Uganda Cranes emipiira 4 gyokka.
Azannyiddeko club endala okuli AS Roma, Bari, Spezia, Cagliari ne Spal nga zonna ze Italy.
Bisakiddwa: Isah Kimbugwe
