Abantu 20 bebagyiddwako endagabutonde, mu nteekateeka y’okuzuula ab’oluganda lw’abantu abaafiiridde mu muliro e Kigoogwa ku luguudo oluva e Kampala okudda e Ggulu.
Endagabutonde bazibagyiddeko ku kitebe kya police e Kibuli, mu ntegeka ekulembeddwamu omusawo wa police omukugu Dr.Moses Byaruhanga.
Omuliro ogwabookezza nebafuuka bisiriiza gwavudde ku mmotoka y’amafuta eyagudde e Kigoogwa, abantu nebakungaana okwesenera ku mafuta, ekyaddiridde gwabadde omuliro ogwakutte abantu 16 bebaakaasiddwa nti baafiiridde mu muliro guno, n’abalala 24 bakyali mu malwaliro bapooca.
Omwogezi wa police mu Kampala n’emiriraano Patrick Onyango agambye nti basuubira nti mu nnaku 3 oba 4, alipoota ku bivudde mu kukebera endagabutonde ejjakuba efulumye.
Waliwo abantu abaabadde mu maduuka gabwe nga bali ku mirimu naababadde batambula agaabwe, wabula amafuta agaakulukuse gwaviiridde omuliro okubatuukako era negubookya.
Abantu 24 bebakyali mu malwaliro ag’enjawulo, 5 bali mu mbeera mbi era bakuumibwa mu busenge bw’abalwadde abayi mu ddwaliro e Kiruddu.
Minister omubeezi ow’ebyamawulire ne Technology Owek. Juliet Nabbosa Ssebugwawo alambudde ku balwadde abali e Kiruddu, buli omu namuwa akakadde ka shs okubayambako ku bujanjabi, era n’asuubiza nti abaafiiriddwa abaabwe president yasuubizza nti bagenda kuweebwa obukadde bwa shs 5 buli maka.
Agambye nti ensimbi ezo zakubaweebwa ng’ebivudde mu kukebera endagabutonde bifulumye.
