Ekitongole ekivunanyizibwa ku bigezo by’amasomero ekya UNEB, kikungubagidde eyaliko ssenkulu waakyo, Mathew Bukenya, avudde mu bulamu bw’ensi ku myaka 89 egy’obukulu.
Bukenya yawummula obuweereza mu kitongole kya UNEB, nga 31 March, 2016, oluvanyuma lw’okukikulembera okuva mu mwaka gwa 1997.
Bukenya yasooka kukola ng’omubaliriizi w’ebitabo mu UNEB okutuusa lweyafuulibwa ssenkulu w’ekitongole omujjuvu, ng’adda mu bigere bya David Livingston Ongom, eyagobwa ku kifo kino.
Mathew Bukenya ajjukirwa nnyo okukulemberamu olutalo lw’okulwanyisa obulyake n’obubbi bwebigezo obwali bususse ebiseera ebyo, era nga yali wankizo nnyo mu kuteereza ekitongole.
Jennifer Kalule Musamba ayogerera UNEB, agamba nti ssenkulu ono yali musaale nnyo mu ntambuza y’ekitongole era babadde bamwebuuzako nnyo kunsonga ezenjawulo.
Bisakiddwa: Ddungu Davis