Ttiimu y'essaza Bugerere eraze amaanyi nate bwewandudemu Kyadondo mu mpaka za Masaza ga Buganda ez'omupiira ogw'ebigere neyesogga omutendera gwa semifinal. 

Omupiira guno guzanyiddwa mu kisaawe kya Santana e Wampewo.

Bugerere eyiseewo oluvanyuma lw'okukuba Kyadondo goolo 5-4 eza peneti. 

Ttiimu zino zisoose kusibagana goolo 1-1, ate nga n'oluzannya olwasooka e Ntenjeru ttiimu zino zalemagana 0-0. 

Bugerere ezeeyo ku semifinal omulundi ogw'okubiri ogw'omuddiringanwa, nga n'omwaka ogwayita 2025 yatuuka ku mutendera guno, era yakwata ekifo kyakuna. 

Gomba nayo egenze ku semifinal oluvanyuma lw'okuwandulamu Buddu ku mugatte gwa goolo 3-1.

 Buddu ekubye Gomba goolo 1-0 e Masaka, ate nga oluzannya olwasooka e Kabulasoke Gomba yakuba Buddu goolo 3-0. 

Kyaggwe nayo egenze ku semifinal bwekubye Mawogola goolo 3-1 e Mukono, omugatte Kyaggwe neyitawo ku goolo 5-2 kuba oluzannya olwasooka e Ssembabule yaluwangula goolo 2-1. 

Emipiira ku mutendera gwa semifinal gigenda kuzannyibwa nga 27 September oluzannya olusooka, era Gomba yegenda okusooka okukyaza Butambala e Kabulasoke ate Kyaggwe nayo yegenda okusooka okukyaza Bugerere mu kisaawe e Mukono. 

Bisakiddwa: Isah Kimbugwe