Omulabirizi wa West Buganda omujja Bishop Gaster Nsereko atuuziddwa ng’Omulabirizi owomusanvu ow’Obulabirizi buno.
Omukolo guyindidde mu kisaawe e Kako mu Buddu.
Omulabirizi Nsereko azze mu bigere by’omuwummuze Bishop Henry Katumba Tamale.
Ssabalabirizi w’ekanisa ya Uganda The Most Rev. Steven Samuel Kazimba Mugalu yaakulembeddemu emikolo egy’okutuuza omulabirizi Gaster Nsereko.
Ssaabalabirizi yebazizza Omulabirizi omuwummuze Henry Katumba Tamale olw’ emirimu emingi emirungi egirabwako gyakoledde Obulabirizi bwa West Buganda, naagamba nti wadde awummudde naye tanakowa era ekkanisa ekyamwetaaga.
Omulabirizi omuwummuze Bishop Henry Katumba Tamale asuubizza amuddidde mu bigere okumuwuliranga bulijjo n’okukola byonna byanamulagiranga, namugumya nti Katonda amuyise mwesigwa ajja kumusobozesa byonna.
President wa Uganda Gen Yoweri Kaguta Museveni, mu bubaka bwatisse Minister w’amasanyalaze n’obugagga obwomuttaka Canon Ruth Nankabirwa Ssentamu Sseggujja, ayozayozezza Bishop Gaster Nsereko okutuuka ku buweereza obwo obunene mu Kanisa ya Uganda, namusaba abuulire enjiri ey’okulwanyisa obwavu mu maka buli mukristayo okuba n’Omwoga mwaggya ensimbi, nti kuba n’ebyawandiikibwa biraga nti ne Yesu yalina Omwoga ogw’obubazzi ng’akola ne Kitaawe Yusufu
President Museveni awadde Omulabirizi Gaster Nsereko emmotoka empya ttuku okumusobozesa okukola obulungi omulimu gw’obulabirizi.
Kamalabyonna wa Buganda Charles Peter Mayiga, mu bubaka bwatisse Omumyuka owokubiri owa Katikkiro era omuwanika wa Buganda Owek. Robert Wagwa Nsibirwa, agambye nti Obwakabaka bwetegefu okuwagira Omulabirizi omuggya.
Kamisona wa Parliament era Omukulembeze w’ekisinde Kya Democratic Alliance era Omubaka wa Nyendo Mukungwe, Owek. Mathias Mpuuga Nsamba ategezezza Omulabirizi omuggya nti mu Ndiga zagenda okusumba mulimu ezetaaga okukangula ku ddoboozi okuzizza mu Kkubo eggolokofu.
Omulabirizi omuggya Bishop Gaster Nsereko yeyamye okukolaganira awamu b’Obwakabaka bwa Buganda ne government eya wakati okuwagira n’okusitula omutindo gw’eby’enfuna mu maka, okukubiriza abantu okukola ennyo naddala okusimba emmwanyi.
Omukolo gwetabiddwako eyaliko Omumyuka w’omukulembeze w’eggwanga Edward Kiwanuka Ssekandi n’eyaliko Ssabaminister wa Uganda Abednego Kintu Musoke, omukubiriza w’olukiiko lwa Buganda olukulu, Owek. Patrick Luwaga Mugumbule, Omukubiriza w’olukiiko lw’abataka Abakulu ab’obusolya Omutaka Namwama Augustine Kizito Mutumba, ba Minister mu government eya wakati n’eye Mengo, ababaka ba Parliament, Abaawule n’abawereza abalala bangi nnyo.#
