Ssabasumba w’essaza ekkulu erye Kampala Paul Ssemogerere asabye abantu abafunye ku nsimbi mu bwesimbu bazikozese okutumbula emirimu gya Katonda n’Okuyamba abanaku, kiyambeko ku nkulaakulana y’eggwanga.
Ssabasumba abadde ku kyalo Gayaza Nangombe Kasanje Buwaya mu Busiro, bwabadde aggulawo amaka g’Omuserikale wa Papa Joseph Yiga n’Omukyala Regina Yiga,neyeebaza abaserikale ba Papa bano olwomutima omugabi eri Eklezia Katolika.
Katikkiro wa Buganda Charles Peter Mayiga asinzidde Kasanje abadde ku mukolo guno, nanenya abavubuka olw’okwaagala Obugagga Obwamangu, mungeri yeemu naasaba abagagga abamansa ensimbi nga baagala babawaane, nti bazizze eri Omukama.
Akubirizza abantu okukola obutaweera okusobola okufuna ebirungi n’okwewala okwagala eby’obwereere. Agambye nti omuntu bwafuna ssente, asaana yetuuseeko ebirungi, asanyuse obulamu bwe n’abantu be.
Amaka gano amatiribona bagatuumye Avellino water front gasobola n’okutegekebwamu emikolo egy’enjawulo, enkiiko, n’obubaga.
Ku lwa banywaanyi b’Abasumba (friends of Bishops Omukungu Emmanuel Katongole yeebazizza abafumbo Joseph Yiga n’Omukyala olw’okukuuma oobufumbo obutukuvu kati emyaaka 35, n’Okubeera abeekisa eri abanaku.
Ku lwa government minister w’ebyentambula Gen Edward Katumba Wamala agumizza abantu be Kasanje nebitundu ebiriranyeewo nti oluguudo Mpigi-Kasanje- Nakawuka lwaafunye kampuni egenda okulukola.
Abajaguza Joseph Yiga n’Omukyaala Genina Yiga beebazizza Omukama olw’obulamu obulungi bwabawadde, era nebeeyama okusigala nga baweereza Eklezia.
Omukolo guno gwetabiddwako Nnaabagereka Sylvia Nagginda, Omulangira David Kintu Wassajja,eyaliko Omumyuuka w’Omukulembeze w’Eggwanga Edward Kiwanuka Ssekandi, Owek Apollo Makubuya,abasumba okuva mu masaza ga Eklezia Katolika agenjawulo ,abasuubuzi, bannabyabufuzi, n’abantu abalala bangi.#
