Akulira oludda oluvuganya government Owek Mathias Mpuuga Nsamba agambye nti kigenda kubeera kyabulabe nnyo eri ab’oludda oluvuganya government n’eggwanga okutwaliza awamu, okwetaba mu kalulu akaddako aka 2026, singa tewabaawo nnongosereza mu mateeka agafuga ebyokulonda mu ggwanga.
Owek Mathias Mpuuga Nsamba abadde ayogerako eri bannamawulire ku parliament okubanjulira ebituukiddwaalko mu myaka ebiri n’ekitundu nga yakulembera oludda oluvuganya government egiweze nga 20 December,2023.
Mpuuga awabudde abakulembeze b’ebibiina ebiri ku ludda oluvuganya government okutunula mu nsonga eno mu bwangu, basalewo oba baneetaba mu kalulu akatambulira ku mateeka amakadde,
gagambye nti ekibiina ekiri mu buyinza ekya NRM nti gekikozesa okubattigomya n’okweremeza mu buyinza nti nga kiteekateeka akalulu akajjudde emivuyo.
Mpuuga anokoddeyo ssemateeka w’eggwanga gwagambye nti government yamujungulula dda, ebiziyiza bingi byagyiibwawo yafuuka kiwowongole, nagamba zino zensonga ezirina okutunulwamu mu bwangu.
Alabudde banne bwebavuganya government nti baleme kulinda bulinzi nnongosereza government zeteekateeka okwanjula mu mateeka g’ebyokulonda ,wabula ennongosereza ezetaagibwa zeezo nga buli munnansi azikkanyizaako.
Owek Mpuuga agambye nti emyaka gye 2 nekitundu egiyise, asoomozeddwa olw’ebibiina by’oludda oluvuganya government ebimu ebyaasalawo okukolagana ne government ate gyebavuganya.
Mu nsonga yekibba ttaka mu ggwanga, Owek Mpuuga akinogaanyiza nti government eri mu buyinza yekiremezaawo, olwensonga nti abakulira ekibba ttaka bakuumibwa b’maggye nabasirikale ba police.
Kubikoleddwa ,Mpuuga mu by’obulembeze bwe obwemyaka 2 nekitundu, agambye nti bingi ebituukiddwako wakati mu kusoomozebwa okuva eri government gyagambye nti eyigganyizza nnyo abagivuganya.
Owek Mpuuga agambye nti mwetegefu okuddamu okuweereza ng’akulira oludda oluvuganya government mu parliament singa ekibiina kye ki NUP , kiddamu okumulonda ku kisanja ekirala.
Wabula era mu ngeri yeemu akinogaanyizza nti singa ekibiina kye, kironda omuntu omulala wakukolagana naye, amuwe obuyambi obwetaagisa okutambuza emirimu.#
