Abaali abakozi ba kampuni ya Nytil nebafiirwa emirimu gyabwe mu myaka gye 90, bafunye kukamwenyu, omulamuzi wa kooti enkulu Faridah Bukirwa bwabategezezza nti balina okusasulwa sente zebabanja.
Omulamuzi Bukirwa agambye nti akaanya nekiwandiiko kya Attorney General, ekiriko abantu bonna abasuka mu 3000 ababanja, obuwumbi bwa shs 6 n’obukadde 80.
Alagidde munamateeka wabwe Mishel Nyabok okutegeka abajulizi babiri abanayogerera sente zebalina okwongerwa okusasulwa, olwensasaanya gyebazze nga bakola kuntambula, okubamalira obudde nga naabamu kubo baafa.
Pulida waabwe Mishel Nyabok agambye nti embalirira yonna egenda kussibwa mu alipoota eya wamu, gyebanaayanjula nga 13 June,2023 omulamuzi lw’abalagidde okudda mu kooti.
Omu kubakulembeze babwe Ssenabulya Walugembe agamba nti bafunye esuubi, nti ensimbi zebabanjirizza ebbanga erisoba mu myaka 20, kyadaaki bayinza okuzifuna.
Nytil yatandikibwawo government y’abafuzi b’amatwale mu 1954 nga kampuni enkozi y’engoye n’emirimu emirala, wabula mu mwaka gwa 1996 government eriko negitunda eri kampuni z’obwannanyini.
Abakozi abaali bakolamu baafiirwa emirimu, era okuva olwo babadde babadde babanja ensimbi z’akasiimo kabwe n’emisoso emirala.
Bisakiddwa: Kirabira Fred
