Katikkiro wa Buganda Charles Peter Mayiga agugumbudde ebibiina byobufuzi ebivuganya government nti bikomye entalo ez’omulwatu bitandike okumalira ensonga zabyo mu bisenge.
Katikkiro okwogera bino abadde asisinkanye abakulembeze b’ekibiina kya NUP nga bakulembeddwamu akulira oludda oluvuganya government mu parliament Joel Ssenyonyi ne Ssaabawandiisi wa NUP David Lewis Rubongoya.
Babadde bakiise embuga okugula emijoozi gy’emisinde gya Kabaka gy’abukadde bwa shs 21.
Katikkiro ategezezza abakulira ekibiina kino nti ennaku zino awulira entalo mu kibiina kyabwe nga ziri mu mawulire olutaggwa, nategeeza nti singa tebakoma kulwanira mulujudde bakyalina olugendo Luwanvu olw’okukwata obuyinza.
“Mulina okuyiga okugumiikirizigana, nga buli omu agumiikiriza munne.Mulina okuyiga buli omu okusaamu munne ekitiibwa.Mulina okubiyiga nga mukyali ku ludda oluvuganya government, bwemutabiyiga kati bwemunaafuna obuyinza munaaba mukyagambwako!” – Katikkiro Mayiga
Katikkiro mungeri yemu awanjagidde banna byabufuzi mu ggwanga okukozesa amaanyi gabwe okutegeeza abantu bebakulembera ku kawuka akaleeta mukenenya.
Akulira oludda oluwabula government Joel Ssenyonyi ategezeza Katikkiro nti bbo nga ekibiina bakwongera okuwagira entekateeka za Ssaabasajja zonna.
Ababaka ba parliament abakiise embuga,kwekuli Francis Zaake Butebi,Ssewungu Gonzaga,Shamim Malende,Teddy Nambooze, Aisha Kabanda,Geofrey Lutaaya,Derrick Nyeko,Abdalla Kiwanuka,nabalala.
Bisakiddwa: Lukenge Sharif
