President Yoweri Kaguta Museven Tibuhaburwa asabye bannauganda obutagezaako kusibira kikoookolo bamusiga nsimbi abagwira,nti kubanga bakoze ky’amaanyi okutonderawo bannauganda emirimu.
President Museven asuubizza nti n’endagaano y’emmwanyi government gyeyakola ne kampuni ya Vinci coffee company eyewanisizza bannauganda emitima, egenda kuddamu yetegerezebwe.
Olwaleero Uganda yegasse ku nsi yonna okukuza n’okwefumiitiriza ku lunaku lw’abakozi nebibasoomoza ku mirimu, ngemikolo emikulu jikwatiddwa mu kisaawe kyamefuga e Kololo, president gyabadde.
President Museven agambye nti waliwo bannabyabufuzi aboogerera ebisongovu ba musigansimbi abagwira,n’agamba nti kino kyabulabe nnyo eri ebyenfuna by’eggwanga.
Mu ngeri yeemu president Museven ayogedde ku bbeeyi y’ebyamaguzi eyekanamye, ng’abakozi bangi tebasobola kubyetusaako olw’emisaala emitono.
President Museven agambye nti government ye yatandise okwogeraganya n’abantu abenjawulo abakwatibwako, okusalira amagezi ebbeeyi y’ebintu eri waggulu.
Ebyo nga biri bityo,Government okuyita mu ministry y’ekikula ky’abantu eteekateeka okuddamu okukola ennongosereza mu tteeka erirambika entambuza yeemirimu mu kittavvu kyensimbi z’abakozi ekya NSSF, eribadde lyakamala okukolebwako ennongosereza.
Government egamba nti obukwakkulizo obwateekebwa mu tteeka eryakayisibwa bungi bukyalemesezza abakozi okufuna ku nsimbi zabwe okwekulakulanya.
Wano mu Uganda Olunaku luno lutuukidde mu kiseera ng’ abakozi obukadde 2.9 baayimirizibwa ku mirimu olwa Covid 19, sso nga nabakozesa abamu business baaziggalawo olwa Covid n’omuggalo.
Embeera eno yawaliriza gavumenti okuyisa ennongosereza mu tteeka lya NSSF, okusobozesa abakozi okufuna ku sente okwezza obujja.
Abakozi abaasooka omuwebwa omukisa okufuna ku sente zabwe bebawezezza emyaka 10 nga batereka mu NSSF, nga baweza n’emyaka 45 egy’obukulu.
Baweebwa ebitundu 20% ku ssente zebalinayo.
Ate abakozi abaliko obulemu abawezezza emyaka 40 egy’obukulu baakkirizibwa okuggyayo ku sente ebitundu 50%.
Wabula government agamba nti ekizudde nti abakozi bangi abaali tebatuukiriza bukwakkulizo obwo, era nga bali mu mbeera mbi so nga balina sente zabwe mu NSSF.
Akulira NSSF, Richard Byarugaba agambye nti ministry yekikula kyabantu eteekateeka okubaako obuwayiro obumu mu tteeka bwekyusa, okusobozesa abakozi abo okufuna sente.
Byarugaba era atubulidde nti obuwumbi obusoba mu 300 bwebwakasasulibwa ekittavvu kino eri abakozi abaqtuukirizza ebisanyizo abasoba mu 18,100, mu nteekateeka empya eya mid-term access bukya etandikibwako omwezi oguwedde ogwa April.
Annyonyode nti waliwo abaliko abakozi ba kampuni yomukutu gwessimu ogwa UTL, nabo abakyalemeddwa okusasulwa ssente zaabwe olwa kampuni gyebaali bakolera okubaako byewandiikira NSSF ngejiyimiriza ku nteekateeka eno.
Richard Byarugaba n’omumyukawe Patrick Ayota, bebamu ku bantu 50 abaweereddwa emidaali gyabakozi, government beesimye olwemirimu egyenkizo.
Abalala kuliko minister w’eby’obulamu , Dr. Jane Ruth Achenge Ocero, eyakulemberamu olutalo lw’okulwanyisa Covid 19, era nakazibwako erinnya lya maama Corona,Dr.Ponsiano Kaleebu,Dr.Steven Kagoda, mulimu abasirikale ba police, abajaasi ba UPDF nabantu baabulijjo.