Club ya Vipers sports Club erinnye ku ntikko ya liigi ya babinywera eya Uganda Premier League, bw’ekubye club ya Onduparaka goolo 4 – 0 mu mupiira oguzanyiddwa mu kisaawe kya St Mary’s e Kitende.
Goolo eziwadde Vipers obuwanguzi ziteebeddwa Bright Anukani, Abdul Karim Watambala, Ibrahim Orit ne captain Milton Kariisa.
Guno gubadde mupiira gwa Onduparaka ogusoose nga batendekebwa omutendesi omugya Steven Bogere.
Kati ebya club ya Onduparaka byongedde okuba ebibi mu liigi, era yesembye wansi n’obubonero 2 bwokka okuva mu mipiira 11 gye yakazannya.
Vipers obuwanguzi bwaleero bugitutte ku ntikko ya liigi n’obubonero 23 okuva mu mipiira 11, BUL yakubiri n’obubonero 23, KCCA yakusatu n’obubonero 22 wabula nga yo yakazannya emipiira 10.
Emipiira emirala egizanyiddwa olwaleero, Villa Jogo Salongo erumbye Blacks Power omwayo mu kisaawe kya Aki Bua Memorial Stadium e Lira, n’egikubirayo goolo 1- 0.
Sheif Batte y’ateebedde Villa Jogo, nedda mu kifo kya 5 n’obubonero 20.
Mungeri yeemu Maroons ekubye Gaddafi goolo 1-0 mu kisaawe e Lizira.
Bisakiddwa: Issah Kimbugwe
