Parliament eyisizza ebbago ly’etteeka erigyeewo ekitongole ki Uganda Trypanosomiasis Control Council nga kyekibadde kirwanyisa ebivvu ebivaako ekirwadde kya mongoota mu bantu ne Nnagana mu magana.
Ekitongole kino ki Uganda Trypanosomiasis Control Council kyatondebwawo okuyita mu tteeka li Uganda Trypanosomiasis Control Act erya 1992, n’ekigendererwa eky’okulwanyisa ebivvu mu ggwanga, olw’obulwadde bwa mongoota obwali bwongera okusaasaana mu Uganda.
Parliament eyisizza ebbago ly’etteeka eryayanjulwa government,erisazizaamu etteeka eryali lyatondawo ekitongole ekyo.
Obuvunanyizibwa obubadde bukolebwa ekitongole kino, butwaliddwa mu ministry y’ebyobulimi n’obulunzi
Ssentebe w’akakiiko ka parliament akavunanyizibwa ku by’obuvubi n’obulunzi saako obulimi akabadde kekeneenya ebbago ly’etteeka erigyewo ekitongole kino, Janet Okori -Moe ,bw’abadde ayanjulira parliament alipoota evudde mu kwetegereza ebbago lino, agambye nti ekitongole kino kibadde n’abakugu bangi abayambye ennyo okulwanyisa ekirwadde kya mongoota nekigweerawo ddala.
Janet Okori- Moe agambye nti okuva ekitongole kino lwekyatondebwawo kibangudde abakugu bangi ,era asabye government nti abakugu abo ebatwale mu ministry y’ebyobulimi n’obulunzi eggwanga lireme kubafiirwa.
Parliament mu mbeera yeemu, eyisiza ebbago ly’etteeka erya The Agricultural Chemicals (Control) (Amendment) Bill eryasaawo ekitongole ki Agricultural Chamicals Control Board, ekivunyizibwa ku kulondoola omutindo gw’eddagala erikozesebwa mu bulimi n’obulunzi
Ebbago ly’etteeka parliament lyeyisizza likutte obuvunaanyizibwa bw’ekitongole ki Agricultural Chemical Control Board nebutwalibwa mu ministry y’ebyobulimi n’obuvubi.
Ababaka bwebabadde bakubaganya ebirowoozo ku bbago ly’etteeka eritutte ekitongole kino mu ministry y’ebyobulimi bagambye nti kibadde kiremeddwa okulwanyisa eddagala ly’obulimi n’obulunzi eryebikyupuli eriri ku katale ka Uganda.